想喺愛爾蘭透過貸款模式購置房屋、車輛或借錢作為應急之用，真係絕對艱難。借貸人除咗要有固定收入之外，仲要有良好嘅消費習慣，良好嘅信用記錄以及定期嘅存款、儲蓄習慣。如果借貸人想透過貸款去置業，就一定要預先留有指定金額嘅存款作為首期之用，另外仲要提供大量文件，證明自己財務狀況穩定；咁先至能夠令到放款銀行 / 公司 / 機構 ( 貸方 ) 相信自己有足夠能力還債。
借貸人申請貸款，需要提供以下文件：
附有照片、附有住址嘅身份證明 ( 例如：護照 / 車牌 )
PPSN 證明 ( 例如：Public Service Card / Tax Credit Certificate )
六個月嘅銀行月結單
三個月嘅信用卡賬單
最近嘅三張糧單
工作証明 ( 是否持有工作簽證身份 )
最近嘅 P60 或工作詳情摘要 Employment details summary
注意 ⚠ 注意 ⚠ 注意 ⚠
由於信用記錄會百分之一百影響借貸金額，因此借貸人喺申請貸款之前，應該查看一下自己嘅信用記錄。中央信用登記網站 Central Credit Register ，負責提供中央信用登記簿，佢係一個數據庫，用於記錄貸款金額等於 € 500 或以上嘅個人貸款信用信息。當借貸人申請咗 € 2,000 或更多嘅貸款時，貸方就必須索取借貸人嘅信用報告。
按此 ► 免費查看自己嘅信用記錄
最低存款金額 ( 首期 ) 指引：
首次置業 - 擁有存款金額需為房價 10%
非首次置業 - 擁有存款金額需為房價 20%
置業作為出租用途 - 擁有存款金額需為房價 30%
存款金額亦會影響借貸人獲得貸款嘅資格。如果首期少，可能會限制借貸人尋找貸方嘅選擇。如果有較多嘅首期，就可以獲得市場上最便宜嘅貸款利率並獲得最優惠嘅借貸方案。
關於住房貸款限額如何計算：
貸方會按照中央銀行提出嘅規定，以貸款收入比 ( LTI ) 和貸款價值比 ( LTV ) 限制住房貸款額。
貸款收入比 ( LTI ) 係基於貸款規模與借款人收入嘅比率。貸款額一般為借款人一年總收入嘅 3.5 倍。但貸款額具有一定嘅靈活性。
貸款價值比 ( LTV ) 係基於貸款規模與購買嘅房屋價值嘅比率。貸款額會以房屋估價為基礎，如首次置業，最多可以借到房價九成嘅貸款。如非首次置業，最多可以借到 房價八成嘅貸款。 如置業作為出租用途 - 最多可以借到 房價七成嘅貸款。
注意 ⚠ 注意 ⚠ 注意 ⚠ LTI 與 LTV 嘅貸款限額會因借貸人嘅收入、工作簽證有效年期、房屋嘅地段、房屋嘅新舊而有所不同。
Comments