喺愛爾蘭做學生真係好舒服，功課少，完全冇默書，冇小測，冇大測，考試只為評估學生嘅學習程度，而唔係用名次去令學生爭過你死我活。學生感受到嘅壓力係比較少，加上老師會透過不同嘅方式讚同學生，Excellent，well done，good job 等說話老是常出現，做學生嘅當然自信心滿滿，優越感十足。
有聽過移居過愛嘅家長感嘆，話眼見自己嘅細路放學後返到屋企冇所事事，又唔見到佢哋喪做功課，又冇話要拎著本書死讀爛讀，硬係覺得佢哋荒廢緊時間咁，非常質疑佢哋究竟有冇學到嘢？
一聽到呢啲說話，我就頓悟港澳教育真係好成功！！係好成功咁洗咗大家個腦，一味以為填鴨式教育制度先係啱嘅，日操夜操冇上限先至叫做學到野，分數唔及格就係失敗嘅象徵，比唔上其他人就一定係自己有問題。教育教到所有人習慣咗「 其他人係咁，我都要係咁，執輸行頭慘過敗家 」。呢種教育制度明明係有問題，但係好成功咁令到所有人都覺得佢係無問題。
學校係社會嘅縮影。如果今日做學生真係需要承受咁大嘅壓力，咁將來作為社會嘅一分子，大家當然會繼續互相擠壓…..
有冇得改變？
好遺憾咁講「 無得改、因為佢哋已經習慣咗！ 」
喺同一種模式底下創造出嚟嘅競爭力有冇用？大家睇下今日嘅澳門，自有定論。
コメント