話說初到愛境嘅新人要加入愛爾蘭職場，通常都會好頭痕，因為真係會無從入手，份 CV 到底應該要點寫？ 要點樣先搵到一份啱自己嘅工？點先知自己冇畀人壓價？點樣為之合理嘅工時？ OT 到底有冇得補水？返工包唔包飯鐘時間？有冇得小休？總之十萬個為什麼？弊在就算喺見工嗰一刻亦未必問到答案，工作合約 ( 如有 ) 亦唔一定有列明….問你怕未。😬
按照我嘅工作經驗，份工如果係熟人介紹，CV 可免。如果想知點寫，就上網搜尋一下。( 因為我從來都冇寫過，真係幫唔到手。)
如想知份工是否適合自己，先試工一個禮拜。咁點解係一個禮拜，唔係兩日、三日？因為呢度好多工種都會係一個禮拜出一次糧，做夠日子可確保自己有糧出，唔怕白做。
所謂合理工時，其實主要係睇係咪可以喺呢度合法工作。如果係黑工，收唔到最低時薪係經常發生嘅。如果係白工都收唔到最低時薪，就要自己衡量下份工嘅工作量同收入係咪成正比？想畀大家了解嘅現況係，打華人工、工資一定會被壓價。而打本地/ 西人工，華人亦都係會被壓價。所以得出嘅結論係，份人工可以收到幾多係冇得話事，最緊要係自己接受到同埋夠用。
關於OT 補水，其實呢度嘅華人工已經做壞晒規矩，早返工遲收工冇補水係定律。但係佢哋都有行規，尤其係餐飲服務業，每個禮拜有小費分，每三個月出一次一個星期雙糧或每年有一個月有薪大假。至於本地工，OT 有 1.25 或 1.5 倍時薪，但係出得多等於畀稅畀多啲。到底邊個好？我真係唔識分….
至於食飯休息時間，其實要問同事、只要大家和睦相處，得閒嗰陣無限輪流 Break 又有乜所謂啫。( 當然老闆在場係唔會有得閒嘅情況出現。)
最後總結：
勞工法例會保障員工，華人工同本地工嘅工作待遇其實係冇差別嘅。
各位打工仔，要 Work Life Balanced 吖😆。
你好，想問一下愛爾蘭有沒有像勞局那樣的政府機構協助登記或配對工作的 。
謝謝
JL