早排留意到自己同家人嘅葡萄牙公民證將會過期，於是嗱嗱臨上葡萄牙駐愛爾蘭領事館嘅網站，諗住可以順利預約到一個啱心水嘅日子去續期公民證。雖然早有聽聞過網上預約攞籌係超級困難，但係難都要去做㗎，鬼叫疫情影響之下，去都柏林葡領換證係唯一嘅途徑咩。
就係咁，非常精彩嘅無限輪迴就開始咗啦！
話說我一家四口中有三口嘅公民證喺同一日到期，咁我已經提早幾個月着手處理網上預約，但係每一次預約輸入曬所有個人資料之後，都只係彈出一句 De momento não existem vagas disponíveis, por favor tente mais tarde ( 即係：目前沒有空缺，請稍後再試 )。如是者：我由每日打開電腦，入資料，等佢彈出有冇位，變成隔日打開電腦，再變成一個星期睇一次......最後我半放棄狀態，決定抱住「 佛系 」心態，得閒先用電腦睇一睇，終於成功攞到三個籌 😶。唉，攞個籌啫，我都用咗三個月時間呀！
( 係呀、換證規定要一人一籌、而都柏林葡領只係上午辦公，我要喺同一日之內攞到三個籌，真係超級高難度！)
好彩！換證嘅過程係好順利嘅，而都柏林葡領嘅職員係超級友善！職員通知只要我哋收到葡葡牙政府寄去我家嘅密碼紙信，就係代表可以返去都柏林葡領攞番個新嘅公民證。
⭕️⭕️ 意想不到嘅意外收穫 ⭕️⭕️
完成攪證後約一個月內，我哋已經收到政府信。咁梗係第一時間出發去攞新公民證啦，新證一到手，我仔細睇吓入面嘅個人資料，竟然畀我睇到我從來未見過嘅三組號碼（ 社會保障卡號碼，國民健康服務卡號碼，納稅人卡和選民登記卡號碼 ）出現喺我同家人 ( 兒童都有齊三組號碼 ）嘅新證上。如果係喺澳門續期，呢三組號碼嘅格內一直只有 「 ✖ 」，今次我哋竟然有齊晒所有號碼，我真係唔知點解會得到佢哋！今次真係得到喜出望外嘅收穫。
係呀，啱啱有朋友通知，而家愛葡領換公民證嘅籌已經派到去今年九月啦！大家如果有需要，真係要好好努力一下！
Kommentare