我生於澳葡政府時期，經歷澳門賭權未完全開放；見證澳門人默默為家庭耕耘，月薪只有數千元嘅年代。當年關閘附近已經有不少走水店，水貨以中藥材為主，澳門人會到店內買取中藥，再經由關閘帶到拱北，從一買一賣中獲得利潤，雖然金額不多，但係已經足夠喺拱北街市買幾日餸帶返澳門。當年澳門除咗賭場之外，仍有製衣廠，玩具廠，牛仔褲洗水廠等等，生產貨品運往海外賺取金錢。澳門人勤勞節儉，係升斗市民，收入唔多，但相對地房屋價格亦都唔貴，今日睇番，甚至乎係可以用超級廉價嚟形容。只要肯做，人人都有能力自置物業。
澳葡年代當然唔係黃金年代，但係我相信今天仍然有唔少人懷念當年嘅種種。
隨著賭權開放，澳門人嘅工資由數千元提升到過萬元，有能力者月薪甚至可以有四、五萬或更多。外面人覺得澳門人人人有工開，個個高薪厚職，十分風光。而澳門人嘅生活亦一步一步走向物質化，吃喝玩樂，盡情享受。不少人會認為樓價由十零廿萬升到數百萬、甚至過千萬，係一種好事。
如果澳門人個個都係手持一個，甚至數個物業，咁梗係好啦。但事實上係，人工加，物價升，儲蓄難，上車更加難。趕唔切喺賭權開放頭十年上車，今時今日，未置業嘅人 / 初次投身社會嘅年輕一代，仲有幾多個可以靠自己嘅收入自置物業？
澳門人喺咪要認真諗吓，澳門賭業仲可以有幾多個黃金十年？賭場係咪真係一個舒適圈？舒適圈又係咪真係咁舒適？
大家都要想想，年輕嘅一代，仍然喺求學當中嘅新世代，將來要面對點樣嘅澳門？繼續重複父母嘅舊路，一畢業就排隊加入舒適圈？定係佢哋會變成收入唔多，而且仲要冇瓦遮頭嘅三無人？
我喺澳門黃金年代初期已經做好選擇。
唔知大家今日會唔會想做一次選擇？
Comments