有時候真係會好矛盾，好怕大家因為睇完愛澳之人分享日常生活之後，會認為去愛爾蘭生活都好似唔錯咁喎，之後就開始喺腦海入面產生各種美好嘅想像，繼而影響咗本來嘅生活。
我有責任，仍需要再一次再三強調：
外國生活看似好正好理想好易過，但係其實全世界都一鬼樣。
現實嘅生活就係柴、米、油、鹽、醬、醋、茶。
如果喺本來熟悉嘅地方生活感受到壓力大，咁去到外國生活嘅壓力只會更大。
我從來都唔認同「唔鍾意咪走囉」。
事實上係：逃避係絕對唔會令到生活過得輕鬆一啲。
選擇出走嘅原因，其實唔係因為唔鍾意；而係因為好鍾意……
好鍾意挑戰自己，所以想由零開始。
好鍾意改變生活，所以想放眼世界。
甚或係好鍾意愛爾蘭，所以放棄澳門。
如果當初係因為覺得自己本來嘅生活千瘡百孔，認為自己已經前無去路，所以想向外尋求一線生機……
要走？
當然可以！
但係要決心捨棄已經擁有嘅一切，要甘心付出任何代價，先好開始移民之路。
十分同意👍，我去了愛爾蘭好幾次，一次比一次的感覺不同，唔可以話越來越差，只是真的會越來越多去比較、去回想 。