近日接二連三收到朋友傳嚟嘅好消息，就係佢哋嘅非歐盟家屬都成功申請到 5 年期嘅 Stamp4 EUFAM Visa。真係可喜可賀。🎉
朋友話：「 等待審批嘅過程真係好難過。又擔心文件唔得，又怕個簽證年期批得少。依家終於見到曙光！我哋可以正式開始新生活啦。」
三位朋友同家人都係上年 7月、8 月舉家移民過嚟，佢哋喺入境後 90 日之內遞交申請表，之後分別喺上年 10 月、12月收到移民局通知接納左佢哋嘅申請，並且喺同一時間出咗臨時簽證比佢哋嘅非歐盟家屬。到咗今年 3 月、4 月，大家等咗約八個月之後，就成功得到 5 年期嘅簽證。
見到咁多成功例子，我都真係非常極之高興。非常多謝佢哋留意我嘅個人分享，相信我喺專頁 / 網站發佈嘅資訊。
在此祝願朋友喺愛爾蘭🇮🇪生活美滿，越嚟越愛❣️愛爾蘭。
關於「 有足夠資金 」嘅要求；移民局係冇白紙黑字寫明要幾多。綜合咗我加上我朋友嘅經驗，我有以下分享：
首先用自己家庭生活開支對比喺呢度生活嘅使費，做一個預算。
假設一家四口準備喺都柏林落腳，租屋加上生活費每個月預計要 € 5,000，咁如果你想一剔過成功申請到五年簽證，最理想就係準備到五年嘅生活開支費用：€ 5,000 x 12 個月 x 5 年 = € 300,000。
咁如果資金有限，就要考慮改落腳地點，唔好住首都。因為都柏林租屋真係太、太、太貴。
咁如果你話既然資金有限，就算改住其他地方，假以時日，啲資金都會用咗一部份，到時都未必可以得到五年期。
喺㗎，有出冇入係好弊㗎。所以我會建議歐盟人仕一定要有工作，要有固定入息，證明到自己有能力維持一家人嘅日後生活，咁對於申請簽證都會有好重要嘅影響。
最後……
🪖⛑ 以上內容純粹係個人分享。一切關於申請簽證要求，請以相關部門決定為準。
真心多謝你的分享。看得出你的文章很有調理，簡潔但很到題。期待你的 『 聖誕；破財』下文。