近排有點忙，忙住去返工⋯⋯
認識我嘅都知道我一直係自由人。自移居過嚟愛爾蘭後，一切都係以家庭為本，照顧家人係我嘅首要任務，亦都係我日常生活嘅重心。
咁點解無端端走去返工？
因為：
仔女已經長大，有自立能力，我當然可以做自己想做嘅嘢。
要與社會接觸，如果唔係我會脫節。
最緊要就係：我要交稅，要做足愛爾蘭公民責任！
咦….
返工要交工作稅喎，你肯定要咁做？
網友曾經同我講：
愛爾蘭嘅稅真係重，其實有冇辦法交平啲？或者可以完全唔使交？
其實作為一個長期居住喺愛爾蘭嘅合法居民，當日常生活中得到政府提供嘅任何支援、支持或者甚至乎係現金補助，咁係好應該去盡公民嘅責任。
如果人人都係抱住一個過路人嘅心態，冇人願意為社會付出，我相信呢個社會只會變成某個大家都唔會鍾意嘅社會。
建議真心想喺愛爾蘭生活，就千祈唔好介意付出。因為喺愛爾蘭得到嘅生活環境、質素，絕對係物超所值。若然換成某啲地方，就算你肯俾錢，都未必買得到自己想要嘅生活！
Comments