回想當初決意喺愛爾蘭自置物業，我從來無考慮過房屋嘅升值能力；只係知道愛爾蘭住房長期供不應求，租金高昂而且短時間內睇唔到有回落嘅跡象。
正如我需要四房單位，如半獨立房屋每月租金支出 € 1,500 至 € 3,000 ( 視乎地區而定 ) ，十五年租金 ( 不計加 / 減租 ) 都已經俾咗 € 270,000 至 € 540,000，以現時嘅樓價嚟講，用同樣嘅價錢，我絕對可以買到合適自己嘅屋，就算將來間屋貶值，只要我唔轉手，我係唔會有帳面上嘅損失。更何況買咗嘅屋係屬於自己，就算間屋將來唔值錢，我都唔認為自己蝕咗。
擁有自置物業，住起上嚟一家人心情都特別好啲，同家人分析完畢，大家都同意買絕對係好過租。
咁當然，如果自置物業能夠保值，甚至可以增值，絕對係 Happy 仔啦！
其實點樣先知道心儀物業嘅市場價值？入貨價是否合理？
我就參考咗 PSRA ( Property Services Regulatory Authority ) 物業服務監管局：
網頁內可查詢到心儀房屋以及同區物業嘅首次成交價，過往嘅成交紀錄，最高位同最低位價格等資料。了解咗市場走勢之後，咁就可以考慮是否應該入手？Bidding 還價都可以有個譜。
另外，大家一定要向地産代理了解心儀房屋嘅小區是否安全？是否 Freehold？有多少房屋係業主自住，有多少係出租？同區有沒有 Social Housing 住戶 ( 公益住房 - 提供俾負擔不起住房嘅人 )？
喺海外置業，一定要了解清楚先好買！
Comments