澳門人，一講到住屋問題，個個都會咬牙切齒。排咩社屋經屋吖，仲慘過無間道，十年又十年。買舊樓等於喺外國買豪宅 ( 當然淨係指個價錢，絕對喺唔關空間同配套事 )。仲話要住豪宅，老老實實，首期比得出幾多先？除非你有父蔭母蔭，要靠自己置業，往往淨係得一個答案、一個字「難」。當然，普通人亦有能力買樓，俾曬辛辛苦苦儲落嘅錢做首期，再問銀行借到盡，分分鐘問埋親戚借錢裝修買傢電。恭喜你、終於成為業主，但同時亦送你另一身份「樓奴」。糧一出，供樓，供車 ( 唔爭在 )，供養自己同屋企人，呢種生活起碼要過廿年。呢個擺明就係…又好似係被迫，但其實又係自己心甘情願落嘅地獄。
咁愛爾蘭人呢？唉、其實人間地獄處處有，愛爾蘭住房問題都好嚴重，房地產市場價格有升無跌，愛爾蘭基本人工唔算低 ( 最低工資 € 9.80 一小時，但份糧當然係比喺澳門做賭場嘅人少 。愛爾蘭政府 2022 年已經將最低工資提升至每小時 € 10.50，2024 年再將最低工資提升至每小時 € 12.70 ) 。加上喺愛爾蘭外出消費拍得住澳門咁貴，愛爾蘭人一樣儲唔到首期，買唔起樓。OK，咁買唔到咪租囉，至弊愛爾蘭房屋供應長期供不應求，我時有聽聞租客比業主拒續租。喺愛爾蘭首都都柏林，一個房間租金至少過千歐元一個月，我強調，係租一間房咋，唔係租成間屋俾你。試問有幾多個澳門人試過同外人 Share House? 喺愛爾蘭，一間屋住咗四個以上唔同國籍嘅人，個個都見怪不怪。
唓，咁你做乜鬼嘢媚外啫。愛爾蘭住屋問題仲嚴重過澳門。喂，大佬呀，而家唔係喺七、八十年代，唔係賣你豬仔，叫你去外國洗大餅。你今時今日冇本錢，係行唔到移民路。更何況你喺澳門搵落儲落嘅首期，其實已經足夠喺愛爾蘭買車買樓。
🖐利申我不住在十大地區內，而文中提及嘅 Tallaght，位置屬於都柏林 24 區，是否好區，見人見智。
且看一看 2014 年台灣傳媒如何報導愛爾蘭嘅樓市低迷與復甦：
係，如果有心長住愛爾蘭，當然買屋比較好。會建議先租後買，（例如租一年），畀時間去了解清楚住宅社區嘅安全度。
即係買好過租？ 但如果真係去，係咪租住先，試下d區份先好d？