轉眼間，定居愛爾蘭經已踏入第四個年頭。一家人由第一年徬徨無助摸索期，到如今生活、上學，工作漸漸步入佳境。大家喺呢四年間真係經歷咗唔少挫折，當中有失望、有抱怨，但興幸從來無後悔當日嘅決定。
回想女兒當年 9 歲離開澳門，中文程度只有小學三年級，英文就更加差，連基礎都未打穩。但我深信，她必定會係最容易適應新環境嗰個。果然如我所料一樣，女兒近年開始以收聽英文音樂 / 觀看英文 YouTube 為主，國語為副。還幸家人日常只會用廣東話作為唯一溝通話語，再加上女兒入坑成為 « 鏡粉一族 » ，有偶像嘅加持，中文會話程度應該早已超越小學三年級，但一講到書寫就……… Sorry 🤦♀️
女兒開始學到嘢，亦漸漸發覺本人嘅英文水平原來十分一般。佢經常串嘴咁講：「 你不如講返中文啦 !」…………「 吓，乜你真係聽唔明㗎 ? 」………「 你 D 英文發音錯曬喎 ! 唔係咁樣讀囉 ! 」………每次俾佢笑完，我只會覺得好開心，心諗：「 Good ! 終於開始見到成績，我就係要佢叻過我。」
當然，身為家長嘅我，係唔會甘心自己越嚟越墮後。為咗要一齊進步，我已經喺成人持續教育中心報讀咗免費劍橋英語會話課程。
阿女，你都要繼續畀心機囉。😉
持續教育和培訓局 ( FET ) 會提供相等於國家資格框架 ( NFQ ) 嘅 1 級至 6 級嘅課程。課程和計劃通過遍佈全國嘅教育和培訓委員會，以及其他本地供應商提供，包括通過 SOLAS 嘅 eCollege ，提供在線 / 課堂教育。任何 16 歲以上嘅合法居民都可以報名參加。
Comments