同好友閑話家常，佢話佢嘅另一半好鬼浪漫咁同佢講：「如果畀我揀多次，我仍然會揀你做我伴侶。」之後，佢問我好友：「咁你呢？」空氣立時停頓……
我聽完哈哈大笑，我反問好友：「你唔係真係想答( 唔會 ) 吓？！」好友半真半假咁話：「係吖，咁得唔得？」
我扮晒附和：得……..咁如果真係去到緣盡，都冇得話唔得啦。但係你咪玩嘢喎。😆
好友一席話，令到我又天馬行空幻想一下，我立即套落去我人生嘅每一次重大抉擇入面，如果有得揀多次，我又會唔會揀另一條路？
答案係唔會，係真係唔會，係絕對唔會。就算明明知道係壞結果，我都唔會後悔自己做過嘅選擇。因為我知道自己每一次作出抉擇嘅時候，我都係忠於自己當時嘅諗法，就算當時有十萬個反對嘅聲音出現，我都知道自己只係會一意孤行。所以，唔好話如果有得揀多次，就算係有得揀多無數次，個結果都只係會一樣。
當日咁肯定自己嘅選擇，點解今日要否定得到嘅結果？
覺得係一個壞結果？？
咁又未必嘅，因為下一個選擇隨時會出現！
人生可以揀 N 次。
我會去揀，認真咁繼續揀！
Comments