本身一直有蛀牙問題，但因為知道愛爾蘭牙醫收費不菲，所以計劃忍耐到返澳門先去整牙。點知今次呢個如意算盤打唔響。長年累月嘅蛀牙始終都係要發爛渣，牙肉發炎腫痛，痛到寢食難安，牙痛真係慘過大病吖。
輾轉反側咗成晚，第二朝一早起身立即打電話去最近嘅牙醫診所預約，電話中被告知全日 booking 已滿。苦苦哀求之下，又好好彩咁俾我爭取到一個時段去睇牙。
終於捱到預約嘅時間，入到診所，職員要求我填寫註冊表格，除咗要填個人基本資料，PPSN 號碼，已登記嘅 GP 資料之外，亦要求我回答十條以上關於身體狀況，有冇藥物過敏等問題。
牙醫初步了解咗我嘅情況之後，立即安排我即場拍牙片，唔使 3 分鐘，就睇到我 D 牙有咩唔妥。牙醫講解點樣處理，同步幫我打麻醉藥，前後用咗唔使20分鐘，就出乎意料之外咁有效率咁處理咗折騰咗我數年嘅爛牙。最後埋單盛惠 € 220 大元。
咁其實愛爾蘭醫療咭包唔包括免費睇牙？
包括。通過牙科治療服務計劃 ( DTSS ) ，16 歲或以上嘅醫療卡持有人每年可以免費檢查牙齒、洗牙、剝牙，補牙兩次*。
但係…….
由於愛爾蘭只有極少數牙醫有參與 DTSS 計劃；所以就算手持醫療咭，都未必可以成功爭取到免費嘅服務。
* 醫療卡持有人可以向居住地區內嘅 HSE Health Centre 查詢區內擁有 DTSS 合同嘅牙醫名單。
以上相關資料請參閱：Citizens Information 牙科服務 ， HSE 牙科服務和治療
圍起港紙 吾洗2000元 ， 最重要 殲滅『牙痛💀』。