剛剛同家人完成英國之旅，家人都好開心，好滿足。但係其實我係有啲唔習慣，因為今時今日嘅英國，早已超越我當年所認知嘅模樣。倫敦市中心各大街、地鐵站、旅遊景點、唐人街等全部都係人頭湧湧，車水馬龍；無論係 weekday 定係 weekend，條條街都係人來車往，彷彿疫情已不存在，甚至乎好似從來未發生過一樣。
雖然我呢幾日只係走馬看花，但係我已經可以好肯定咁話畀大家知，倫敦絕對比都柏林繁榮得多，仲要唔係多少少，係多好多。如果要我舉例，兩者差距嘅情況就好似香港同澳門一樣。
朋友問我喜歡英國嗎？
我話：喜歡，因為食物種類繁多，絶對滿足到華人嘅胃。購物一流，中西日韓貨品應有盡有。搵工比較容易，處處都可以見到招聘。生活絕對係多姿多彩。
朋友問我想唔想去英國長住？
我話：而家嘅諗法係唔想。雖然倫敦係大都會，但係真係太多人，而且個個都行動迅速，我只係稍為停一下影幅相，朋友已經走得離我遠遠。自問早已習慣生活慢悠悠嘅我，面對如此急速嘅都市生活，實在係冇咁容易適應到。
愛爾蘭嘅慢條斯理，
絕對趕不上，
英國嘅一日千里。
假若有人同你講，
去唔到英國唔緊要，
愛爾蘭都係一樣嘅。
我會話：
咪住！
請大家先好好了解愛爾蘭，
愛爾蘭絕對唔係英國，
先問問自己想點樣過生活？
再去決定邊度先係最適合自己！
コメント