近日同澳門嘅老朋友閑談，佢話終於明白點解我咁唔想留喺澳門，亦都好佩服我，話我無論係十幾歲定係幾十歲，永遠都係咁膽生毛，話離開就離開，睇我移民好似完全冇難度咁。
我話：其實一個人會選擇離開自己嘅成長地，出走他方，真係好關自己嘅家庭背景、成長人生嘅際遇、大圍嘅環境事。要離開，真係要講天時、地利、人和，缺一不可。
想當年我十幾歲，因為家庭環境複雜，未成年就被迫要放棄學業，自己養自己。當時澳門仍未回歸，大圍經濟環境一般。自己搵錢亦搵得唔多，加上當時失戀受情傷，霎時之間，驚覺學業、家人、愛情全部離我而去，此時朋友叫我去愛爾蘭走走，我考慮咗三日，知道自己係冇嘢可以輸，衰到貼地嘅生活狀況帶畀我無比嘅勇氣同決心，我立即答應朋友嘅邀請，返屋企打包好一喼衫，帶上全副身家兩百英鎊，跟朋友直奔到香港啟德機場。此次為第一次出走，一別澳門就係七年嘅光景。
當我雙腳再次踏入澳門嘅土地時，我已經擁有我嘅另一半同埋未出世嘅兒子，我同自己講，我唔會畀我嘅仔女困喺澳門一世，我一定要畀佢哋見識到呢個世界係可以好美好。
我好感激上天畀咗第一次出走機會我。
今次，
就由我自己去創造天時、地利、人和。
去完成第二次出走，
我嘅仔女，就係我出走嘅勇氣。
後話：
我多年嘅努力終於得到回報 ，2017年我已經舉家回流返嚟愛爾蘭啦。❣️
當年，離開澳門7年，當時點解唔入愛爾蘭籍？
了解過，投資移民門檻都高
有本葡國護照真好！