你問：澳門 / 香港駕駛執照能夠直接換成為愛爾蘭駕駛執照嗎？ 有比重新考取愛爾蘭駕駛執照更方便嘅方法嗎？
我答：不能夠。如果你指「更方便」、其實係無嘅。
你問：愛爾蘭人工普遍高唔高？難唔難搵工？
我答：愛爾蘭現時最低工資 ( 稅前收入 ) 每小時 € 10.50, 基本收入每星期 € 420 ( 稅前收入，以每週工作 40 小時計算 ) 。工種方面，如果從事基層職位，藍領容易搵工過白領。 2023 年最低工資增加至 ( 稅前收入 ) 每小時 € 11.30 。
你問：如果子女想用 EU 歐盟費用入讀愛爾蘭大學，是否必須要喺愛爾蘭讀滿五年中學先可以享有呢？
我答：根據愛爾蘭教育部指引，自 2014 年 9 月起，喺愛爾蘭境內就讀小學或中學至少五年嘅愛爾蘭、歐盟、歐洲經濟區或瑞士學生，係可以享受歐盟收費標準。但係，所有大學均擁有決定學費收費標準嘅自主權，在此建議直接向學校查詢。
你問：愛爾蘭同英國嘅生活係咪差唔多呢？
我答：相似但不同。氣候方面，兩地十分相似，一樣都係多雨水、少陽光。教育方面，愛爾蘭一直沿用英式教育。醫療方面，愛爾蘭沒有類似英國嘅國民健康服務計劃，所以醫療費用唔會平。住屋方面，愛爾蘭長期缺乏供應，所以租屋、買屋比英國難，開支比英國大。生活開支方面，愛爾蘭家庭住戶不用交水費，但能源費用係相當昂貴，食品價格亦不斷上升中。治安方面，沒有大型恐襲，但各區都會有唔同程度嘅暴力同罪案出現。
你問：愛爾蘭私立中學，如果想申請學位入讀，是否需要經過面試，看成績及能力收生？
我答：私立中學可以直接透過學校網頁內提供嘅 contact 聯絡學校，電郵查詢也可以。學校秘書會直接答覆你所有問題。
你問：除左 Dublin，建唔建議住第二個城市？我都好多心，又想買樓平啲，Dublin 嘅屋我都覺得好貴，但又想 target 私立 ／ 好學校，又想容易 D 揾 IT 工。
我答：做 IT 可以考慮好多地區，唔一定要住 Dublin。Cork 亦有好多 IT 公司招聘員工。而好學校亦唔一定入私校。你可以先了解學校排名，再睇下選擇邊一區做落腳點。
你問：近年係咪多咗好多澳門人 ／ 香港人移民過愛爾蘭？邊個地區最多澳門人／ 香港人定居？
我答：近年係多咗好多澳門人 ／ 香港人移民過嚟愛爾蘭。但真正住喺澳門而離開嘅澳門人真係唔多，同埋住得好分散，真係唔知邊區最多。以我住嘅地區為例，應該至少有 5 戶以上係真澳門人。香港人主要住喺 Dublin，D 15 / D22 更成為近呢幾年嘅熱門落腳點。
你問：最近多看了愛爾蘭嘅新聞，好似電費貴咗好多，唔知一個家庭現時每月電費開支大約多少？房地產也很火熱，樓價和租金都持續上升。建屋少，需求大，如果解決唔到住屋問題，除咗會影響移民人士，也會影響就業市場。唔知政府取態如何？會唔會支持多建房屋？哪裡可以看到政府未來建屋的目標數量？如果建房多供給，或許可以壓抑樓價的上升。
我答：交幾多電費取決於房屋大小，BER 高低，同埋個人是否節約用電。以我四人家庭為例，現時電費每兩個月平均支付 €200，Gas 費每兩個月支付約 €180。至於政府房屋取態，你可看看此 文章。關於愛爾蘭政府未來建屋目標，你可看看： Government launches Housing for All - a New Housing Plan for Ireland 。
Comments