搬入新居接近兩年，家中物品接連出現各種各樣不同程度嘅損耗 - 去水渠去水不順暢、牆身油漆剝落、大門把手太鬆、鎖膽損壞、窗較趟門卡住卡住⋯⋯自問有強迫症，日日喺屋企左睇睇、右摸摸、真心覺得好唔順眼！
朋友問點解唔叫師傅嚟執一執間屋？唉，咪就係要慳錢囉！
咁好啦，諗住啲起心肝自己 DIY ！但係其實唔係樣樣都可以自己攪掂，就好似有一次發現自家後園奇臭無比，原來係汚水渠塞咗，塞嘅程度係每次家人一沖涼就有水喺污水渠蓋湧返出嚟。初頭膽粗粗，自己走去買材料通渠，嘩，一揭開渠蓋，「 香氣 」四溢，當晩晚餐已經可免。最後自知無能為力，死死氣走去揾通渠佬，盛惠 € 120💸。
係呀、喺愛爾蘭如果需要揾水、電師傅上門維修，凈係 Call Out 費用都要俾至少 €60 - €100，仲未計人工、材料等費用呢！
所以，如果知道係手板眼見嘅功夫，就最好自己動動手吧！唔識？唔怕，依家網絡資訊發達，一打開 YouTube ，搜尋一下，絕對可以揾到好多教學短片啱用！
嗱嗱嗱！強烈聲明呀！真係 Easy Job 先好自己處理呀！會觸電嗰啲；冇學過真係玩唔起㗎！
Kommentare