出身於澳門並有幸擁有葡萄牙國籍嘅我，打從十零歲開始就感受到持有葡萄牙護照嘅「好處」：我可以暢通無阻進出歐盟國家，可以無限期逗留歐洲，可以有資格獲得歐盟各國嘅免費義務教育，亦可以選擇喺歐盟國內合法生活和工作。
以上種種「好處」係優勢，貌似好著數，但其實係需要用自己嘅人生去實行。
我離開成長嘅地方，遠離所有家人、朋友，放棄已經建立好嘅一切。
我需要忍受唔被接納嘅眼神、感受無人支持嘅寂寞，需要調整個人心態去融入社會，去適應每一個全新嘅環境。
最重要嘅係錢！
無錯係錢！
無任何經濟支援嘅我，需要自己去搵錢，去應付日常生活開支。加上初到愛境，英文唔夠叻，無人事，唯有靠勞力去維持生活。每日重覆返工，放工，兩點一線….. 重覆又重覆，無奈亦無助。
今日，身邊嘅朋友會羨慕我，認同我嘅決定。
但係作為當事人嘅我，回想過去嘅付出，都未必敢講自己有勇氣再做一次。
世上並沒有樂土，亦沒有最好。唯有選擇，才能改變現況。
我支持改變，改變會帶來希望。
但係，想改變之前，要確定自己夠實力去承受改變過程中所產生嘅一切！
Comentários