朋友問：其實我哋到底要預幾多時間去申請非歐盟家屬嘅居留簽證？係咪一定申請到先？中途走咗去 ( 離開愛爾蘭 ) 得唔得？
我：其實我真係講實唔到俾你知，要用幾耐時間去申請，因為你交嘅文件證明是否齊全？啱唔啱移民局嘅要求？呢個絕對會影響你嘅申請進度。我亦唔敢寫包單，移民局會批到幾多年簽證俾你。因為你嘅財務狀況，先係移民局最著重嘅考慮因素。用 EU Treaty Rights 嘅法例，歐盟人仕嘅非歐盟家屬係有絕對合法嘅身份喺愛爾蘭行使居留權益，但係呢個都要由愛爾蘭移民局去決定，你哋嘅居留是否合乎國家經濟利益？如果佢認為你哋未夠資格，你就要不斷證明自己唔會成為愛爾蘭嘅負擔。一句講到尾 ；都係錢作怪。
我： 以我嘅經驗，我就用咗一年半左右，幫我屋企人攞到 5 年 ( 最長 ) 居留權，當然我哋申請中途冇離開過愛爾蘭。
Time slot 說明：
EU 歐盟人同非歐盟 人一齊飛入愛爾蘭境，並向海關聲明會行使 EU Treaty Rights 權利，幫非歐盟 家屬申請居留簽證。
歐盟人要喺 90 日之內辦好 PPSN ，要有自己名下嘅愛爾蘭銀行戶口 Current Account，要有自己名下嘅愛爾蘭地址證明 ( 租約，電費單，網絡費單等等 ) 。如果本身財力有限，就要有工作證明自己有固定收入。
注意 ⚠ 注意 ⚠ 注意 ⚠
一定要喺非歐盟人入境後 90 日限期之內寄出居留申請表！當然越早寄出、就會越快得到回覆！當移民局收到你嘅申請，就會查閱你嘅文件是否乎合相關要求。
如果所有文件都過關，移民局會出一封信俾非歐盟人去搞臨時簽證，臨時簽證會將非歐盟人嘅合法逗留期延長去到移民局出最終簽證結果嘅日期為止。而臨時簽證有效期多數會係非歐盟人入境日期嘅一年內。
如果遞交文件唔夠齊，移民局會要求你一個月之內交齊相關文件，佢哋確認咗補交文件冇問題之後，先會出一封延長臨時簽證信俾非歐盟人。如果你一個月內交唔出，你就要向移民局解釋清楚情況，以及何時才可以補交資料。呢個補交文件嘅過程，係最嘥時間嘅過程，所以我絕對建議 ：大家一早要睇定申請表，早啲準備文件。
*** 如果中途搬屋，或者財務狀況有改變，記得一定要寄最新嘅資料去移民局更新資料。***
轉下眼，臨時簽證又到期，如果簽證過咗期之後仲未收到移民局通知，就要 email 問吓佢進度去到邊？
申請簽證嘅過程絕對係你急佢唔急，但係萬一遇到有咩唔明，或者等好耐都收唔到佢嘅回信，就一定要立即向移民局查詢清楚。千祈唔好齋等，因為依度寄失信件嘅情況係會時常出現㗎！
💥 由 2022 年 3 月 1 日起，愛爾蘭發出嘅 IRP 卡有最新版本。
Yorumlar