時間倒數 N 年前，因為一位朋友、我認識到愛爾蘭，亦因為有葡籍呢個身份、我有幸能夠喺愛爾蘭生活。記得初到愛境，發現自己完全聽唔明任何英文 ( 愛爾蘭口音絕對係一個大挑戰 )，心諗「唔係下嘛，話曬叫做喺澳門由細學英文學到大、點解會咁」，但諗真D，唔識咪慢慢學囉，反正我不嬲面皮夠厚，如果畀人笑，我又笑吓囉。
第一次接觸愛爾蘭人，How are you ？ I am fine, thank you. 少不免，由初初成日 Sorry, I don’t know，到後來攬頭攬頸一齊去酒吧蒲，愛爾蘭人畀我嘅印象係超級友善 ( 亦十分爛飲 )。 如是者、一住就住咗喺愛爾蘭幾年。當年網絡資訊係零，想喺身邊搵同聲同氣嘅人，永遠 5 隻手指數完 ( 我當年去咗埠仔 = Town )。但又好好彩、身邊總係出現唔少朋友，有車嘅，車我去都柏林玩。讀書嘅，帶我去返吓學。日子真係過得好開心......最開心嘅係、愛爾蘭令我碰上了他......他也是澳門人、冇錯，當年澳門唔好景，有一批人走咗去歐洲搵食，連咁冷門嘅愛爾蘭，都吸引咗唔少澳門人，反正澳門人會覺得、搵到錢嘅地方，就係好地方。Why not Ireland ? 直至到金融風暴、愛爾蘭變成歐洲出名的黑豬國，而澳門又因為賭權開放，澳門人開始陸陸續續回澳搵食。當然我也是回澳人仕嘅其中之一。
三年前，我著手準備再次移居 ( 算是回流嗎？🤨 ) 愛爾蘭，先發現原來要喺網上搵到啱用嘅資訊、真係少得可憐。澳門車牌、唔啱用、要重新考過 ( 當年澳葡年代，澳門車牌可以直接換成愛爾蘭車牌，話咁快就可以揸住架車周圍去 ) 。之前喺愛爾蘭申請咗嘅報稅卡 ( 其實唔係叫做報税卡，但係我當年喺用佢嚟報稅 ) ，太舊，要換過。喺愛爾蘭嘅銀行戶口，冇用超過十年已經冇曬任何紀錄，要重開。唉呀，以為自己拖著個喼、飛過來愛爾蘭就可以 ( 因為想當年我喺咁 )，但原來到而家需要再用時先發現、自己之前喺愛爾蘭生活過嘅痕跡差唔多冇曬。好在，自己知自己事，留有一手舊資料，有好過冇。今次又再一次自己摸條路出嚟。
愛爾蘭我回來了 !!!
Comments