我身邊有好多澳門朋友都唔習慣做選擇，亦都好怕做選擇，佢哋話自己本身性格係咁。但係我唔會相信，我只認為絕大部份係喺成長嘅環境中培育出嚟。
我要感謝我父母，由細到大都畀我自己揀，包括每日食咩早餐，買衫想買邊款衫，少少唔舒服唔夾硬迫我返學，放學後睇飽卡通片先肯去做功課，測驗考試唔認真溫書，甚至乎唔溫，直接去裸測、裸考。久而久之，我已經習慣自己有話事權。同時，我亦都學習到，如果揀錯，我係要付出代價。
就係因為有經歷過咁樣嘅成長環境，我學習到自己嘅人生係自己控制，係有絕對嘅自主權，係絕對可以 「 大家一齊要走東，我偏走西。」我有權利 say no ，我亦都敢 say no。
我覺得倒模咁生活先係有問題…...
小朋友唔想讀書，只係想玩，當然冇得揀。返完 8 個鐘頭學，仲未完，仲話補多 4 個鐘頭習，仍然冇得揀。放假又話要去操十八般武藝，唔去一次得唔得？都唔輪到佢哋揀……到佢哋長大，想返荀工，想輕輕鬆鬆咁生活，想搵錢夠使就好。當然佢哋唔會覺得有可能，因為佢哋覺得係冇得揀。
朋友話：我真係唔敢揀吖，我怕我揀錯！
我話：錯咗咪再揀過，一日未死，一日都仲可以繼續揀到啱為止。唔揀就真係錯晒啦！
附圖：
愛爾蘭已經係冬令時間，較咗慢鐘，依家晏晝五點鐘左右就會開始天黑，未到夜晚七點，高速公路就黑到伸手不見五指。我哋雖然要摸黑而行，但係有咩好怕？
Comments