外國人好講信用，此信用並唔係指此人講說話有冇口齒，而係指此人喺財務上有幾值得被信任。
初到愛爾蘭，喺無生活痕跡、無人認識嘅情況之下，基本上個人信用度係等於零。
如果無信用；就會無法得到財務上如：信用卡、購物分期付款、個人貸款、銀行按揭貸款等等嘅支持。
愛爾蘭中央銀行設有中央信用登記冊，中央信用登記冊係一個資料庫，資料庫內會儲存 € 500 歐元或以上貸款嘅個人信用資訊。
貸方可以查閱借款人嘅信用報告。
個人亦都可以免費查閱自己嘅信用報告。
對於建立個人信用度，我有以下分享：
當開設銀行帳戶嘅時候，除咗開一個流動戶口處理日常收入同支出，最好另外開一個儲蓄戶口，每月存入一定嘅金額，以顯示自己嘅理財能力同儲蓄能力。
當有穩定嘅工作收入之後 ( 固定收入超過半年 )，可以向銀行申請個人信用卡，並且持續使用信用卡消費，呢個時候就一定要有借有還，千祈唔可以爭卡數。
當持續進行以上嘅步驟，基本上就已經建立咗一個基本嘅良好嘅個人信用度。
如果有需要，呢個時候就可以嘗試去申請小額借貸，繼續有借有還，將自己嘅信用度慢慢越推越高。
信任並唔係一日就可以得到。
只有持之以恆，先可以十拿九穩。
Comments