喺今年 2022 年完結之前，好急咁返咗澳門一趟。捱完政府 5 + 3 防疫要求 ，偽單身咁過咗一個好寧靜但孤獨嘅聖誕。依家正在準備面對一個喜慶【陽陽】嘅倒數同滿堂【紅】嘅 2023 年。
係吖，我仲喺澳門，相隔半個地球咁遠嘅家人同朋友仲笑緊我：你就勁啦，乜嘢類型嘅菌你都遇過晒。😒
今次走呢一轉，係為咗做一個唔可以令自己後悔嘅決定。雖然明知取、捨之間定必有所失去，想輕鬆放手，真係好唔容易.......但係，人生就係咁，只要有得揀，我唔會唔揀。
用咗半個月嘅時間解決咗件事。臨返愛爾蘭之前，順便處理埋另一個好棘手嘅問題 ― 家當。有睇過我舊貼嘅網友可能會有印象，就係當初我同家人移居去愛爾蘭時，只係好瀟灑咁每人拖兩個篋就上飛機，澳門屋企嘅物品，我一直無急於處理，一心以為之後嘅每一年都可以繼續用拖篋解決問題。點知 COVID 會令到澳門自封數年.........如是者，一直等到而家，終於係時候要做一次徹底嘅了結，努力斷捨離；好好完成一次連根拔起。之後，愛爾蘭會真真正正成為我嘅家。
注意 ⚠ 注意 ⚠ 注意 ⚠
關於轉移個人 / 家庭舊有物品到愛爾蘭，愛爾蘭政府有相關要求及標準。出發地嘅物流運輸公司會要求客戶先提供以下文件，而且必須要得到愛爾蘭對應嘅物流運輸公司確定文件無問題之後，才會接受客戶訂單，報價以及安排上門包裝、取貨以及回覆出發嘅船期。
填寫居住轉移表：免除進口稅和車輛登記稅的申請和聲明。其中包括一份聲明，需要表明您嘅財產係由您擁有，並且係您喺愛爾蘭居住之前嘅境外常居住地使用至少六個月。
提供詳細資料：所有同行人仕嘅護照影印本 / PDF，愛爾蘭發出嘅居留簽證影印本 / PDF ( 如有 / 如適用 )，愛爾蘭發出嘅 PPSN ( 或何時會申請 PPSN ) ，結婚證書英文版影印本 / PDF ( 如適用 )。
居住證明：兩張愛爾蘭住址證明 ，一張來自出發地嘅住址證明。
愛爾蘭工作證明：如工作合約 / 糧單。如沒有，需要說明當前嘅就業情況。
當地日常生活開支紀錄證明：提供來自出發地嘅過去 12 個月開支紀錄以及來自愛爾蘭嘅過去 12 個月開支紀錄 ( 如有 / 如適用 )。
簽署居住地轉移聲明：TOR 1 Form
Comments